အဲဒီညနေက ကားမှတ်တိုင်မှာ

ကျနော် ဘက်စကား စောင့်နေသည်။ သည်ဝါကျမှာ အပိုင်းသုံးပိုင်းပါသည်။ ကျနော်..ဘက်စကား..စောင့်နေသည်။

အဲဒီညနေက ကားမှတ်တိုင်မှာ

ကျနော် ဘက်စကား စောင့်နေသည်။ သည်ဝါကျမှာ အပိုင်းသုံးပိုင်းပါသည်။ ကျနော်..ဘက်စကား..စောင့်နေသည်။ ကျနော်သည် ပြုလုပ်သူဖြစ်သည်။ ဘာလုပ်သလဲ။ စောင့်နေသည်။ ဘာကိုစောင့်နေသလဲ။ ဘက်စ်ကားကို စောင့်နေသည်။ ဘက်စ်ကားသည် စောင့်နေခြင်း ခံရသူဖြစ်သည်။ ကျနော် ပြန်စဉ်းစားသည်။ ကျနော်က ပြုလုပ်သူဆိုလျင် အခြေအနေကို ဖန်တီးခွင့် ကျနော့်မှာ ရှိရပေမည်။ ကျနော်စောင့်နေလျင် ဘက်စ်ကားက လာကိုလာရမည်။ ဘက်စကားသည် ကျနော့်စေခိုင်းရာအတိုင်း လုပ်သူဖြစ်ရမည်။ သူက ပြုလုပ်ခံရသူဟု ဆိုထားသည် မဟုတ်လား။ မှတ်တိုင်မှာ ကျနော်ရပ်နေပုံကလည်း ဘက်စ်ကားကို လာကိုလာရမည်ဆိုသည့် ဟန်ပန်ဖြင့် စောင့်နေပုံမျိုးဖြစ်သည်။

အမှန်တကယ်ကျတော့ သည်လိုမဟုတ်ပါ။ ဘက်စ်ကားက ကျနော်စောင့်နေသည့်အတွက် လာမည်ဆိုသည့်သဘော မဟုတ်ပါ။ အကြောင်းတစုံတရာကြောင့် အချိန်အကြာကြီးကြာမှ လာချင်လာပါလိမ့်မည်။ ဒါမှမဟုတ် အကြောင်းတစုံတရာကြောင့် မလာပဲလည်း နေချင်နေပါလိမ့်မည်။ သေချာသည်မှာ ဘက်စ်ကားလာမှ ကျနော်သွားလိုရာကို သွားနိုင်မည်ဖြစ်သည်။ သည်ခရီးကို အခြားနည်းလမ်းများထက် ဘက်စ်ကား စီးသွားမှ ဖြစ်နိုင်သောကြောင့် ကျနော် ဘက်စ်ကားကို စောင့်နေခဲ့ခြင်းဖြစ်သည်။ ကျနော်က စောင့်နေရသူ ဖြစ်ပါသည်။ စောင့်နေသောကြောင့် စောင့်သူ၊ ပြုလုပ်သူဟု ကျနော့်ကို သတ်မှတ်လျင် မမှန်နိုင်ပါ။ ကျနော်သည် စောင့်နေရုံမှအပ ဘာမှ မလုပ်နိုင်ပါ။

ကျနော်သွားချင်သော ခရီးသည်လည်း စောင့်နေရုံဖြင့် ရောက်မသွားနိုင်ပါ။ ထိုအခါ ဘက်စ်ကားသည် အရေးကြီးလာပါသည်။ ကျနော့်အတွက် အရေးကြီးလာပါသည်။ ဘက်စ်ကားသည် ကျနော်က စောင့်နေခြင်းကို ခံနေရပါသည်။ ထို့ကြောင့် ဘက်စ်ကားကို ပြုလုပ်ခံရသူဟု သတ်မှတ်လျင်လည်း မမှန်နိုင်ပါ။ သူက ကျနော်စောင့်နေသော်လည်း လာချင်လာမည်။ မလာချင်လည်း မလာပါ။ သူ့မှာ သူ့အကြောင်းနှင့်သူ ရှိနိုင်ပါသည်။ ထိုအကြောင်းကို ကျနော်က မသိနိုင်ပါ။ တစုံတရာလည်း မစွက်ဖက်နိုင်ပါ။ သေချာသည်မှာ ဘက်စ်ကားလာမှ ကျနော်သွားလိုရာ ခရီးကို ရောက်ပါလိမ့်မည်။ ထိုအခါ ဘက်စ်ကားသည် ကျနော့်အတွက် အရေးကြီးလာပါသည်။ သူသည် ကျနော့်ခရီးကို မြန်အောင် နှေးအောင်၊ ရောက်အောင် မရောက်အောင် ဖန်တီးနိုင်သူ ဖြစ်လာပါသည်။ ထိုအခါ သဒ္ဒါသဘောသည် မှားယွင်းသွားပါသည်။ ကျနော်သည် စောင့်နေသော်လည်း ပြုလုပ်ခံရသူ ဖြစ်သွားပါသည်။ ဘက်စ်ကားသည် စောင့်နေခြင်း ခံရသော်လည်း ပြုလုပ်သူဖြစ်သွားပါသည်။

စာကြောင်းတကြောင်းဖြစ်ရန် ပြုလုပ်သူ၊ ပြုလုပ်ခံရသူနှင့် ပြုလုပ်ခြင်းတို့ ရှိရမည်ဟု ဆိုပါသည်။ ပြုလုပ်ခံရသူ မပါသော စာကြောင်းများလည်း ရှိပါသည်။ သို့သော် ပြည့်စုံသော စာကြောင်းဟု ဆိုနိုင်မည်လား။ ဥပမာ ကျနော်စောင့်သည်ဟု ဆိုပါတော့။ ကျနော် ဘာကိုစောင့်သလဲ။ အမျိုးမျိုးဖြစ်နိုင်ပါသည်။ အခွင့်အရေးကို စောင့်တာလား။ ပဲပြုတ်သည်ကို စောင့်တာလား။ ချစ်သူကို စောင့်တာလား။ အရက်ဆိုင် တံခါးအဖွင့်ကို စောင့်တာလား။ ဖြစ်နိုင်စရာတွေ အများကြီးရှိသည်။ သို့သော် ကျနော်က စောင့်နေသည်။ စောင့်နေသည်ဆိုသည့် စကားလုံးမှာ အစောင့်ခံတခု လိုနေသည်ကိုတွေ့ရသည်။ စားနေသည်။ ဖတ်နေသည်။ နမ်းနေသည်။ ရိုက်နေသည် စသည့်စကားလုံးတို့မှာလည်း အစားခံ၊ အဖတ်ခံ၊ အနမ်းခံ၊ အရိုက်ခံ အရာတခုခု လိုအပ်နေပါသည်။ သို့သော် ငိုနေသည်။ ရယ်နေသည်။ အိပ်နေသည်။ ထိုင်နေသည် စသည့်စကားတို့အတွက်တော့ ပြုလုပ်ခံတခုခု မလိုပါ။ တွေးရင်း နည်းနည်းလမ်းချော်သွားပါသည်။ ကျနော်သည် သဒ္ဒါဆရာ မဟုတ်ပါ။ ဘက်စ်ကားစောင့်နေသူတယောက်သာဖြစ်သည်။

ဘက်စ်ကားစောင့်ရင်း တခုခုမတွေးဖြစ်အောင် ငေးမောယူရလောက်သည့် မိန်းမတယောက်ယောက်လည်း မှတ်တိုင်တွင်မရှိပါ။ ဟိုပြောဒီပြော စကားစမြည်ပြောစရာ အဖော်တယောက်ယောက်လည်း မပါပါ။ ထိုအခါ ကျနော် ဆက်တွေးပါသည်။ ကျနော် ဘက်စ်ကား စောင့်နေသည်။ သည်မှာ ပြောစရာ ခေါင်းစဉ်သုံးခု တွေ့ပါသည်။ နံပတ်တစ် ခေါင်းစဉ်မှာ ကျနော်ဖြစ်သည်။ ကျနော်သည် ခရီးတခု သွားမည့်သူဖြစ်သည်။ ထိုခရီးသည် လမ်းလျောက်သွားရန် အတန်ဝေးသော ခရီးဖြစ်သည်။ ထိုအခါ ဘက်စ်ကားစီးသွားရန် ကားမှတ်တိုင်ကို ရောက်လာသူမှာ ကျနော်ဖြစ်သည်။ ကားမှတ်တိုင်ကို ဘက်စ်ကား စီးသွားရန် လာရခြင်းမှာ ကျနော့်မှာ ကိုယ်ပိုင်ကား၊ ဆိုင်ကယ်၊ စက်ဘီး စသည့် ကိုယ်ပိုင်ယဉ်တခုခု၊ လမ်းလျောက်သွားခြင်းထက် ပိုမိုမြန်ဆန် သက်သာစေသော ကိရိယာပစ္စည်းတခုခု မရှိခြင်းကြောင့်ဖြစ်သည်။ ကျနော်သည် အများပြည်သူ ခရီးသွားလာလွယ်ကူစေရန် စီစဉ်ပေးထားသည့် ဘက်စ်ကားကိုစီးမှသာ မိမိလိုရာ သွားနိုင်မည့်သူဖြစ်ပါသည်။ နည်းနည်းဖြည့်ပြောရလျင် ဘက်စကားခပေးရန် ရှိသူလည်းဖြစ်သည်။ သို့သော် အငှားယဉ်စီးရန် ပိုက်ဆံမလုံလောက်သူ၊ သို့မဟုတ် နှမြောသူ၊ သို့မဟုတ် အငှားယဉ်စီးသွားရလောက်အောင် အရေးကြီးသည့် ကိစ္စတခုခု မရှိသူလည်းဖြစ်ပါသည်။

ဒုတိယခေါင်းစဉ်မှာ ဘက်စ်ကားဖြစ်သည်။ လူအများလိုက်ပါစီးနင်းလို့ရအောင် တည်ဆောက်ထုတ်လုပ်ထားသည်။ လူအများသွားလာလွယ်ကူစေရန် စီစဉ်ပေးထားသည့် လမ်းကြောင်းများအတိုင်း မောင်းနှင်သွားလာသည်။ သတ်မှတ်ထားသော မှတ်တိုင်များတွင် လူအတင်အချလုပ်သည်။ အနည်းဆုံးစရိတ်ဖြင့် ခရီးတခုကို သွားနိုင်အောင် သင့်တင့်သောနှုန်းထားတခုကို ယူသည်။ တယောက်ကိုတယောက် မသိသူများ အတူတကွ စီးနင်းကြသည်။ လိုရာမှတ်တိုင်ရောက်လျင် မည်သူ့ကိုမျှ နှုတ်ဆက်ရန်မလိုပဲ ဖုတ်ဖက်ခါ ဆင်းသွားလို့ရသည်။ တချို့ဘက်စ်ကားက သစ်သည်။ တချို့ဘက်စ်ကားက ဟောင်းနွမ်းစုတ်ပြတ်သည်။ တချို့ဘက်စ်ကားက ချောင်ချိသည်။ တချို့ဘက်စ်ကားက ကြပ်သိပ်ညပ်နေသည်။ တချို့ဘက်စကားက အန္တရယ်ဖြစ်လောက်အောင် အကြမ်းပတမ်းမောင်းသည်။ အမြန်မောင်းသည်။ တချို့ဘက်စ်ကားက တရေးလောက် ကောင်းကောင်းမှေးနိုင်လောက်အောင် အိတွဲ့လေးဖင့်သည်။ အခု ကျနော်ရေးနေသည့် ဘက်စ်ကားအကြောင်းလိုပင် စိတ်ပျက်ဖို့ကောင်းသည်။ သို့သော် ခင်ဗျားတို့လည်း ဘက်စ်ကားစောင့်ဖူးသူများ ဖြစ်နိုင်ပါသည်။

နောက်ဆုံးခေါင်းစဉ်ကတော့ စောင့်နေသည်။ စောင့်နေသည်ဆိုသည့် ပြုလုပ်ခြင်းကိရိယာသည် ကျနော်ပြောခဲ့သလို ဆန့်ကျင်ဘက် အဓိပ္ပါယ်တွေကိုလည်း ပေါက်ဖွားစေပါသည်။ ကံနှင့်ကတ္တားကို ပြောင်းပြန်ဖြစ်သွားစေပါသည်။ စောင့်နေသူသည် မရေရာပါ။ စောင့်နေသူသည် ဘာမှမတတ်နိုင်ပါ။ လည်ကလေးတဆန့်ဆန့်နှင့် စောင့်နေရပါသည်။ သူ့ကို တယောက်ယောက်က ခိုင်းထားသလို ဇွဲကောင်းကောင်းနှင့် စောင့်နေပါသည်။ ဘက်စ်ကား မလာမှာကို စိုးရိမ်ပူပန်စွာ စောင့်နေပါသည်။ ချိန်းဆိုထားရာဆီ အချိန်မီမရောက်မှာကို ကြောင့်ကျစွာ စောင့်နေပါသည်။ ဘက်စ်ကားလာမှ စောင့်နေခြင်းကိစ္စ ပြီးပါမည်။ ဘက်စ်ကားမလာမချင်း စောင့်ကြရပါမည်။

ဆိုရလျင် ကျနော်နှင့် ဘက်စကားတွေ့သွားသည်နှင့်၊ ကျနော့်ရှေ့မှာ ဘက်စ်ကား ရပ်လိုက်သည်နှင့်၊ ဘက်စ်ကားပေါ် ကျနော်တက်လိုက်သည်နှင့် စောင့်နေခြင်း ပြီးဆုံးသွားပါသည်။ စောင့်ဖို့ မလိုတော့ပါ။ စောင့်နေသည်ဟု ပြောရန် မရှိတော့ပါ။ ကျနော်နှင့် ဘက်စကားကြားတွင် စောင့်နေသည်ဆိုသည့် စကားလုံး မရှိတော့ပါ။ ဘက်စကားက ဆက်မောင်းသွားပါသည်။ ကျနော်က ကားပေါ်မှာ ပါသွားပါသည်။ ဘက်စ်ကားကို ကျနော်စီးသွားပါသည်။ ဘက်စကားသည် ကျနော်စီးတာကို ထိုအချိန်ကျမှ ခံရပါတော့သည်။ ထိုအခါ ကံနှင့်ကတ္တားသည် နေရာမှန် ရောက်သွားလေသည်။ သို့သော် ကျနော် ဘက်စ်စကားစောင့်ခဲ့သည်ဟု ပြောချင်မည်ဆိုလျင်တော့ ပြောနိုင်ပါသေးသည်။ စီးနင်းလိုက်ပါသွားမှတော့ စောင့်ခဲ့သည်ဆိုသည့် အကြောင်းက အရေးမကြီးတော့ဟု ယူဆချင်လည်း ယူဆပါ။ သိုသော် နောက်တခါ ဘက်စ်စကားအကြောင်း ပြောလျင် စဉ်းစားလျင်၊ ဘက်စ်ကား စီးတော့မည် ဆိုလျင်တော့ စောင့်သည်ဆိုသော စကားလုံးကို ရှောင်ကွင်း၍ မရနိုင်ပါ။ ဘက်စ်ကားဆိုတာ စီးမည်ဆို စောင့်ရပါသည်။

Special Credit: Hnin Khar Moe (Remembering and Refeaturing Myanmar Blogger's post)

Images credit to original owner


blank

22 Blog Postagens

Comentários